Tremujori i parë ka sjellë ndryshime domethënëse në renditjen e bankave tregtare për nga madhësia. Mbështetur në të dhënat e paaudituara, të publikuara nga Shoqata Shqiptare e Bankave, Credins Bank këtë tremujor ka kaluar Raiffeisen dhe është aktualisht banka e dytë më e madhe në Shqipëri.
Në fund të marsit, Credins Bank raportonte një total aktivesh prej 237.5 miliardë lekësh ose 15.3% të tregut. Credins Bank ngelet njëkohësisht edhe huadhënësi më i madh në ekonominë shqiptare, me një portofol huaje prej 106.6 miliardë lekësh ose 18.5% të totalit të portofolit të kredisë bankare.
Raiffeisen tashmë renditet banka e tretë për nga madhësia, me vlerë totale aktivesh 232.5 miliardë lekë ose rreth 14.9% të tregut bankar shqiptar. Megjithatë, Raiffeisen po shfaqet më aktive në kreditim dhe ka konsoliduar pozitën e vetë si huadhënësi i dytë më i madh në ekonomi, duke lënë pas Bankën Kombëtare Tregtare.
BKT ngelet ndërkohë banka më e madhe në vend, me një total aktivesh prej 415 miliardë lekësh. Megjithatë, pjesa e BKT ka zbritur në 26.7%, nga 27% që ishte në fund të vitit të kaluar.
Intesa Sanpaolo vazhdon të mbajë vendin e katërt për nga madhësia, me 12.3% të aktiveve, e ndjekur nga OTP Bank me 6.2%.
ABI Bank dhe Tirana Bank këtë tremujor kanë kaluar me një diferencë të vogël Alpha Bank dhe tashmë pozicionohen përkatësisht si banka e gjashtë dhe e shtatë më e madhe në vend.
Pjesa e tregut e bankave, sipas totalit të aktiveve.
| BKT | 26.7% |
| Credins | 15.3% |
| Raiffeisen | 14.9% |
| Intesa Sanpaolo | 12.3% |
| OTP | 6.2% |
| ABI Bank | 5.1% |
| Tirana Bank | 5.1% |
| Alpha Bank | 5.1% |
| Union Bank | 4.4% |
| Fibank | 2.1% |
| ProCredit Bank | 2.1% |
| UBA Bank | 0.6% |
Në tërësi, sistemi bankar ka regjistruar një rritje të konsiderueshme në tre muajt e parë të këtij viti. Totali i aktiveve arriti në 1.56 trilionë lekë, 4.2% më shumë (rreth 62 miliardë lekë në vlerë absolute) më shumë në raport me fundin e vitit 2019. Megjithatë, rritja relativisht e lartë është edhe efekt i një mbiçmimi të ndjeshëm të euros në fund të muajit mars, kur janë mbyllur edhe raportimet financiare tremujore. Mbiçmimi i euros ka rritur vlerën e shprehur në lekë të aseteve në monedhën europiane.
Ju uroj suksese te metejshme. Une kam qene dhe jam klienti juaj panvarsisht se kohet e fundit banoj ne München gjermani. Per mua ju ini Banka e pare ne shqiperi per komunikimin me klientet. Sidomos zoti Xhafa e zonja Ushe me te cilet kam komunikuar. Respekte per Stafin tuaj. Ju pershendes Behar Çaçollari München Deutschland.