Pandemia e Covid 19 ka goditur rëndë eksportet shqiptare që në muajin mars. Sipas të dhënave nga Instituti i Statistikave, eksportet ranë me 36% krahasuar me të njëjtën periudhë të një viti më parë.
Ndërkohë që rënia është shtrirë pothuajse tek të gjitha mallrat e eksportit, goditjen më të rëndë e ka marrë sektori i fasoneve, që është edhe shtylla kryesore e eksporteve shqiptare. Për marsin, eksportet e tekstileve dhe këpucëve pothuajse u përgjysmuan krahasuar me vitin e kaluar.
Rënie të thellë kanë pësuar eksportet në grupin “Materiale ndërimi e metale”, me 50% dhe “minerale, lëndë djegëse, energji”, me 41%. Ndërkohë, grupi i produkteve ushqimore ka qenë ndër më pak të prekurit dhe eksportet për marsin ranë vetëm me 7%. Sipas partnerëve tregtarë, pandemia ka goditur sidomos eksportet drejt Italisë, që praktikisht u përgjysmuan për muajin mars.
Megjithatë, edhe në këto kushte ka një lajm të mirë: pavarësisht rënies së eksporteve, bilanci tregtar i vendit për marsin u përmirësua ndjeshëm. Deficiti tregtar ishte 24 miliardë lekë, 15% më pak krahasuar me marsin e vitit të kaluar.
Kjo natyrisht ka ndodhur sepse importet për marsin pësuan një rënie edhe më të thellë në vlerën e tyre. Sipas Instat, për marsin u importuan mallra në vlerën e 42 miliardë lekëve, në rënie me 24% krahasuar me marsin e vitit të kaluar.
Grupet që pësuan më shumë rënie ishin “minerale, lëndë djegëse, energji”, me 34% dhe “tekstile e këpucë”, me 14%.