Kompania hungareze e shërbimeve të Teknologjisë së Informacionit dhe Komunikimit 4iG ka arritur një marrëveshje për të blerë kompaninë më të madhe celulare të Malit të Zi, Telenor Montenegro. Aktualisht, Telenor Montenegro kontrollohet nga PPF Group, kompani e regjistruar në Holandë. Palët kanë rënë dakord që të mbyllin transaksionin brenda datës 30 nëntor të këtij viti, pas marrjes së miratimeve të nevojshme të autoriteteve malazeze.
“Blerja e Telenor Mali i Zi është në përputhje me strategjinë e zgjerimit rajonal të 4iG. Pozicioni i fortë në treg i Telenor Montenegro dhe kapaciteti i tij i fortë gjenerues i të ardhurave, mund t’i sjellin vlerë të madhe të shtuar grupit tonë,” tha pronari dhe Drejtori i Përgjithshëm i 4iG, Gellert Jaszai.
Telenor Mali i Zi u ble nga PPF Group në 2018, së bashku me disa operatorë celularë rajonalë. Me 338,000 abonentë dhe të ardhura nga shitjet prej 43 milionë euro (51 milionë dollarë) në 2020, Telenor Montenegro është lider absolut i tregut në segmentin celular malazez.
Dy të tretat e të ardhurave të Telenor Mali i Zi vijnë nga pajtimtarët privatë dhe ata të biznesit.
“Ne shohim potencial të konsiderueshëm të rritjes në rajonin e Ballkanit Perëndimor dhe presim që gjatë pesë viteve të ardhshme, rritja ekonomike e rajonit të mund të rritet ndjeshëm nga zgjerimi i Bashkimit Evropian. Prandaj, ne synojmë të rrisim më tej praninë tonë në rajon, përveç blerjes që sapo kemi njoftuar. Për këtë qëllim, ne jemi duke eksploruar vazhdimisht mundësitë e investimit në sektorët e telekomit dhe IT, “shpjegoi Jaszai.
Synimi i kompanisë hungareze për t’u zgjerur më tej në tregjet e Ballkanit Perëndimor është mjaft konkret. Pas arritjes së marrëveshjes për të blerë Telenor në Mal të Zi, 4iG është në negociata me grupin turk Çalik për të blerë operatorin më të madh të linjave fikse në Shqipëri, Albtelecom. Burime nga kompania bëjnë të ditur se hungarezët janë duke kryer një due diligence dhe pritet që gjatë vjeshtës të formulojnë ofertën e tyre për Albtelecom.
Albtelecom është operatori më i madh i shërbimeve fikse në Shqipëri. Në vitin 2020, Albtelecom raportoi të ardhura nga shërbimet fikse në vlerën e 3.9 miliardë lekëve ose rreth 41% të volumit të përgjithshëm të tregut. Megjithëse vazhdon të kryesojë tregun, të ardhurat e Albtelecom kanë pësuar rënie me 12% krahasuar me një vit më parë.
Në segmentin e shërbimeve celulare, për vitin 2020 Albtelecom zotëronte rreth 13% të tregut, me të ardhura në vlerën e 3.16 miliardë lekëve, në rënie me 16% krahasuar me një vit më parë.
Albtelecom e mbylli vitin 2020 me humbje neto në vlerën e 1.17 miliardë lekëve. Humbjet u zgjeruan me 82% krahasuar me një vit më parë. Përkeqësimi i rezultatit financiar erdhi nga rënia e bazës së të ardhurave dhe rritja e shpenzimeve financiare. Totali i humbjeve të akumuluara në fund të vitit të kaluar arriti vlerën e 14.8 miliardë lekëve.